unner ‘t fenster in köken
filappers up ’t papier
rode klören brune
en bietje blau un swart
de göör van bohnen un fleesk
moder an d‘ füürstee
dat griese dook
bunnen in hör nack

gedrüüs in mien ohr
nix to verstahn
he haut up de klepp
van de kökendöör
tweemaal sien hand
an hör kopp
links rechts
dreiht sük um
un noch eenmaal

ik drück mien stohl
tegen de müür
krall de hannen
fast um dat holt
moder an d‘ füürstee
röhrt in de pott
dat griese dook
up de deel

ligg in mien kamer
bi nacht
gedrüüs in mien ohr
van tegenan
scheet doch to
büst soldaat
de wand so spillern
nix hören nix sehn
treck mien knejen
tegen de kopp

moders hand
striekelt mien haar
slaap mien jung
he dröömt so swaar
de krieg is vörbi
de krieg is vörbi
lang vörbi \\