Benutzer-Werkzeuge

Webseiten-Werkzeuge


fiev_kilo_iesder

Dies ist eine alte Version des Dokuments!


Fiev Kilo Iesder

Manfred Briese

Geerd harr doch eenfack van nee seggen kunnt,
An ’t Telefon vör veerteihn Daag.
Man dat Wicht klung so sööt, dat Wicht klung so leev.
Nu kummt een van d’ Mozart-Verlag

„Du Tini, ik segg hum, de Firma reep mi,
Ik muss de Maschien kuntrolleern!
Segg doch, ok du harrst naar Wichtigs to doon,
Kannst hum rutkumpelmenteern!“

Se nickkoppt. Dat pingelt. En Siegfried vör d’ Döör.
Weitblond. Naar frünnelk. To vööl.
„Denn komen S’ man rin!“, nöögt Tini hum.
Au! De oll Dezimaalwaag up d’ Deel!

„En wunnerbaar Stück!“ He rievt sük sien Kneei.
Seggt Geerd: „Ja, um de bün ’k naar blied!
De hebb ik vör Jahr van mien Grootvader arvt.
Man dat spiet mi. För mi word ’t nu Tied.“

He knippoogt noch stiekum sien Ollske wat to,
Dat se Siegfried weer wegstüren sall.
He smitt sük in ’t Auto un glieks bruust he loos.
Man wied neet – bit achter de Wall.

He steiht up de Luur. He stoppt sük de Piep.
He kickt up sien Klock. – Düvel ok!
Halv Stünn al un nix keen Siegfried to sehn!
Noch fievteihn Menüten – genoog!

Geerd krabbt sük. Wat doon de? Wat maakt se mit hum?
Amenn kloppt he hör noch week!
Se kriggt van hum Mozart, un wat he van hör?
He gifft Gas, as de Dood nett so bleek.

To Huus sitt se mit de Keerl Moors an Moors.
Mit Kopphörers. Ogen sünd dicht.
Blot Sinnen för Mozart sien Requiem.
Neet för ’t Dezimaalwaaggewicht.

Fiev Kilo Iesder an d’ Achterkopp!
Daar sitt keen Vertreder mehr liek!
He sackt bi de Sied. Dat Haar farvt sük rood.
Un Tini höört Mozartmusik.

Dit Gedicht word kritiseert un besproken in dat Ostfriesland-Magazin 5/2012

fiev_kilo_iesder.1386493581.txt.gz · Zuletzt geändert: 2013/12/08 10:06 von karsten

Seiten-Werkzeuge