Benutzer-Werkzeuge

Webseiten-Werkzeuge


paul_trede

Paul Trede: Utfragen

„Sett Di an mien gröne Sied!
So! Nu sallst Du mi vertellen
Van Dien Bruud ut olle Tied!“ -
„Kind“, see ik, „Du magst woll schellen!
Ja, ik harr een, dat is wahr,
As ik noch na d’ School hengung -
Dat is her al mennig Jahr,
Un ik was ja noch so jung.

Süh, ik will daar neet mit prahlen.
Denn Du höörst dat wiss neet geern;
Disse Haarkrull hebb ik stohlen,
Un ik holl hum noch in Ehr’n.
Ja, dat Wicht mook mi to ’n Deev;
Wo dat kwamm, dat se mi dwung?
Süh, ik harr hör ja so leev,
Un ik was ja noch so jung.“

„Was se smuck?“ – „Dat weet ik neet,
Denk doch maal, wo lang is ’t her!
Disse Tied is lang vörbi,
Se was, dücht mi, licht as 'n Feer.“
„Was se riek?“ – „Se stunn sük good,
Doch dat was ’t neet, wat mi fung.
Wat froog ik na Geld un Good!
Süh, ik was ja noch so jung!“

„Brochst hör ok woll maal na Huus?“ -
„Na, versteiht sük, dee ik dat!“
„Gaff dat ok woll maal Verdruss?“ -
„Nee, dat hebb’n wi heel neet hatt.“
„Un Ji wassen vööl alleen?“
„Ja, so vööl as dat eets gung.“
„Wat büst Du för ’n Driever west!“
„Na, ik was ja noch so jung!“

„Hett se later Di vergeven?
As 't vörbi was - wat en Quaal!
Hest Du hör en Duutje geven?“
„Oh, so mennig, mennig Maal!
Un ik hebb hör nooit vergeten,
Un de Leev is neet vörbi,
Höör, mien Kind, nu sallt Du ’t weten
Süh, de Haarkrull is van Di!“

Oostfrees van Hans-Hermann Briese. Ut: Plattdütsch Blomengarden Verlag Fischer & Franke Berlin 1907

paul_trede.txt · Zuletzt geändert: 2017/07/12 15:57 von chdirks

Seiten-Werkzeuge