Benutzer-Werkzeuge

Webseiten-Werkzeuge


neuigkeiten

Dies ist eine alte Version des Dokuments!


Wat gifft 't Neeis?


* Bolko Bullerdiek kriggt van 't Jahr de Borsla-Pries! De word utgeven an 12. November in Barßel. Wi graleren! Bolko is Plattdüüts-Mester, Autor, Quickbornbladdjemaker, Rutgever un wat mehr …

* Peter Bürger warkt siet Jahren over un för plattdüütse Literatur in 't Suurland. Daar hett he 2014 al in Bevensen de Johannes-Saß-Pries kregen, un nu kreeg he an 27. Oktober de Rottendorf-Pries. Mehr as verdeent!

* DIESEL gifft dat nu haast 25 Jahr. Dat is al wat. Un all de Jahren hebben Carl-Heinz Dirks un Hans-Hermann Briese daar hör Fliet an daan. Nu kriegen se för hör Wark de Fritz-Reuter-Pries ut Stavenhagen, de Reuterstadt. An Fritz Reuter sien Gebuursdag, de 7. November.

* De Schrieverkring Weser-Ems kwamm weer binanner. An 22. Oktober in Leer. As alltied mit Warkkritik, un mit Kulturprogramm. Ditmaal word de Puppen-Utstellen van Elise Andresen-Bunjes in de Evenbörg besöcht. De Utstellen löppt noch bit in d' Januar. Mutt een sehn hebben!

* Nu hebben wi in Oostfreesland 'n moderne Grammatik!
Wilko Lücht hett de „Ostfriesische Grammatik“ schreven, un de Oostfreeske Landskupp hett dat Book nu an d' Lücht brocht. Heel klook dat Book, daar kannst mennig Avend an lesen. Man würkelk good schreven, un nödig was 't ok al lang.

* De Priesdragers van de Freudenthalpries 2016 sünd daar: Jutta Oltmanns (Warsingsfehn) un Are Meiers (Groningen) delen sük de Pries, un de „Anerkennen“ geiht an Wilko Lücht (Ok ut Warsingsfehn). Wi graleren!

* NDR Vertell-doch-mal is weer oflopen. Thema was Keen Tied.An d' 12.Juni wurren de 25 besten Geschichten in 't Ohnsorg-Theater in Hambörg vörstellt. Ok van 't Jahr sünd weer fiev Oostfresen unner de besten 25 van annerthalvdusend Schrievers, de mitmaakt hebben. Dat sünd Elise Andresen-Bunjes, Hans-Hermann Briese un Wilma Lüken - all van de Schrieverkring Weser-Ems, daarto Andrea Henkelmann ut Grootfehn un Holger Röskens ut Weener, de för sien Text „Tied to 'n Sammeln“ de veerde Pries kregen hett. De eerste Pries gung an Thomas Stelljes ut Rotenbörg anne Wümm.

* De Schrievers van de Schrieverkring Weser-Eems kwammen in d' Aprilmaant 2016 weer binanner, ditmaal in Celle, bi uns Kolleeg Guschen Heitmann. Daar fierden wi 'n bietje sien 80. Gebuursdag un de 20. van de SKWE. As alltied worren Texten mitbrocht, vörleest, beproot un kritiseert. Un dat Book „Segg van Ji an dien Spegelbild “ van Manfred Briese wurr vörstellt.— Deit 14,80 € kösten, is fast inbunnen un heel mooi! De mehr weten will: Nafragen bi manfred.briese@schrieverkring.de

* De Johann-Friedrich-Dirks-Pries 2017 wurr an 9. Feberwaar 2016 utschreven. Bit 31. Oktober könen Schrieverslüü Texten henstüren na 't Kulturbüro van de Stadt Emden. Mehr unner Johann-Friedrich-Dirks-Pries van de Stadt Emden. « Hier klicken.

De Johann-Friedrich-Dirks-Pries 2015 wurr an d'12. Feberwaar in de Rummel van 't Emder Raadhuus overgeven. De grote Dirks-Pries gung an Jutta Oltmanns ut Moormerland (OF), de lüttje Pries an Jürgen Kropp ut Blickstedt (SH). Un de Pries för de Kinner un jung Lüü hebben de Schölers van de 3a van de Grundschool Constantia in Emden haalt. De hebben daar 'n Book. van maakt, dat bi de School to kriegen is, un ok over DIESEL.

* Theo Schuster is overleden. He hett neet blot Boken verköfft, he hett ok welken maakt, as Verlag un as Autor un as een, de Geschichten sammelt, oll Vertellsels, Volksgood. He hett 'n heel Rieg Autoren funnen un rutbrocht, de vandaag noch wat tellen, so as Wilhelmine Siefkes, Greta Schoon, Hinrich Kruse, Siegfried Kessemeier. För all sien Wark hett ok 'n Riege Priesen kregen, so de Ubbo-Emmius-Medaille van de Oostfreeske Landskupp un tolesd de Wilhelmine-Siefkes-Pries van de Stadt Leer. Wi hebben hum vööl to verdanken, hebben Bült van hum leert un ok 'n Bült Pläseer hatt!

* Hans-Hermann Briese, een van de DIESEL-Rutgevers, hett för all sien Wark för oostfreeske Kultur un Plattdüüts 'n Orden kregen – dat Nedersassiske Verdennstkrüüz an 't Band.'n hoge Utteken! Mehr d'rvan bi http://www. archiv.plattnet.de/data/2016-01-06--20-30-25, daar ok de Bericht ut de Ostfriesen-Zeitung, de Link na de OZ is http://www.oz-online.de/-news/artikel/173138/Land-wuerdigt-Einsatz-fuer-das-Plattdeutsche

* De Borsla-Pries 2015 gung an Carl-Heinz Dirks för sien Text Pilgerpad. De Pries wurr overgeven in en Fierstünn Saterdag, de 14. November in Bösel. De Pries is ok för 2016 weer utschreven. Texten mutten bit Enn Juni in Bösel ankomen. Mehr unner www.borsla.de

* De Freudenthal-Pries 2015 gung an Marlou Lessing un Willi Höfig för dat Book „Dat grote Speel Renski“.
En Sonderpries gung an Jutta Oltmanns, de tosamen mit Roland Dubberke för hör Wark „Rosengöör“ un Maanschien„. Musiek ut verleden Tieden in Oostfreesland, wunnermooi umsett. Spegelplaat un Bookje daarbi sünd bi hör to kriegen.

* De Arbeitskreis ostfriesischer Autorinnen und Autoren / Warkkoppel oostfreeske Schrieverslüü ak-ostfriesischer Autoren kummt dreemaal in 't Jahr binanner. Daar worden Texten beproot un kritiseert un Terminen ofsproken. – 'n neje Anthologie is plaant: „Moderne Zeiten“ sall de heten. Nu al worden daarför Texten verwacht, man Tied daarför was bit 15. Januar.

* Ok 2015 was weer Poetendag in Ihl! An Sönndag, de 30. August bi 't Klooster. Daar leesden Schrieverslüü ut Groningen un van de* De Arbeitskreis ostfriesischer Autorinnen und Autoren de hele Dag ut hör Texten vör. Sall anner Jahr weer geböhren, um dat dat so mooi is! Well d 'r maal inkieken will bi de oostfreeske Schrieverslüü, de kann dat geern. Kösten för de Dag: 20 € (mit Eten un Koffje/Tee & Kook d'rbi. ). Even anmellen bi 't Plattdüütsbüro van de Oostfreeske Landskupp.
Mehr up de Sieden van de AK » ak-ostfriesischer Autoren
Man de sünd upstünns neet in Gang,
daar wassen Hacker an 't Wark!

*
NDR-vertell-doch-mal: Dat Thema was: „Op Straat“. Unner de besten 25 Schrievers sünd ok weer sess(!) Oostfresen:: Hans-Hermann un Manfred Briese, Wolfgang Frühling, Udo Franken, Jutta Oltmanns un Elke de Witt, fiev d'rvan Lidd bi de Schrieverkring Weser-Ems. Jutta Oltmanns hett sogaar de 3. Pries haalt. Dat Book Vertell doch mal - Op Straat is bi Wachholtz rutkomen un in de Bookhannel to kriegen.

*
Dat oostfreeske Online-Woordenbook** is nu al 'n heel Sett daar un word geern bruukt. Dat mutten Ji ankieken un utproberen! Daar finnen Ji 45000 Woorden hoog-platt + platt hoog, mit Woordverklarens, grammatiske Förmen un besünner Seggwoorden un Utdrücken. 'n Rieg Woorden worden daar ok proot, dat een weet, wo sük dat anhören mutt. To finnen unner: http://www.platt-wb.de

neuigkeiten.1477675158.txt.gz · Zuletzt geändert: 2016/10/28 19:19 von chdirks

Seiten-Werkzeuge