Gedicht van de Maant – November 2010

Novembermaant, dat is ok de Karkhoffsmaant. Dook /Daak liggt over ‘t Land, word froh düüster un ‘t all klamm. Passt daar neet best dat Gedicht van Hilde Frauke Wichmann-Steen, dat as all uns Gedichten ok to natolesen is in dat Book “De 100 mooiste oostfreeske plattdüütse Gedichten”, rutkomen bi DIESEL. (diesel@diesel-online.de).
Dat Gedicht van disse Maant is ok weer besproken in dat Bladd “Ostfriesland-Magazin” bi Soltau-Kurier, Nörden.

Hilde Frauke Wichmann-Steen
Tut ench Amun

Bün lang al
dood

un doch
ok neet.

Ji menen
mien Ogen sünd sloten?
Sünd se
un ok neet.

Se sehn
de Mensken
de Tieden
wat d’r was
un wat d’r kummt.

Ji menen
mien Mund is sloten?
Is he
un ok neet.

Un daarum hört:

Ik weet
daar van en Book
steiht in
schreven
all Jo Doon
un Laten.

Un daarum
segg ik Jo
wat ik lang al
vördeem weet:

Ji sölen
Goods doon
up de Eer!

Dat alleen
sall geböhren!

Kiekt mi an:
Gold
nix as Gold
mien Gesicht
mien Kledaasje

Gold
up de Eer
Gold
in de Eer
kien Begünn
un kien Enn.

Meent
is aver dat:

Söökt dat Gold
in Jo Harten!

Ik see ‘t
al eenmaal:

Ji sölen
eenzig blot
Goods doon up de Welt!

Dann leven Ji
of starven
so

as ik dood bün
un bün ‘t

ok neet.

Leave A Comment, Written on November 3rd, 2010 , Diesel Texten, Ostfriesische Autoren, Texten up Platt
Gedicht van de Maant: Oktober 2010

Egenlik hett Elisabeth Pollmann dat wall verdeent. Se was in de Septembermaant 100 worden. ‘n RIege Boken hett se maakt, hel vööl kennen “Dat Hamerke”. Daar steiht ok dat Titelgedicht in, dat wi nu hier brengen, un vööl Pläseer d’r mit!

Elisabeth Pollmann

Dat Hamerke

Ik weet en lüttje Hamerke,
Dat kloppt för sük alleen.
Dat wohnt in ‘n rode Kamerke,
Man nüms kriggt dat to sehn.

Kummt bi hum ins in ‘t Kamerke
Vööl Arger un Verdreet,
Dann sluurt so swaar dat Hamerke,
As harr ‘t keen Rüümte neet.

Man kickt daar Bliedskupp in un Freid,
Dann puckert ‘t wunnerlik.
Dann is ‘t, as wenn dat wasst un greit,
So heel ofsünnerlik.

Ik weet en lüttje Hamerke,
Dat kloppt, as Gott dat will.
Un enes Daags is ‘t Kamerke
Utwohnt un – muuskestill.

Ok dit Gedicht steiht bi “De 100 moiste oostfreeske plattdüütse Gedichten”, rutgeven van C.H.Dirks in de Diesel-Verlag.

Leave A Comment, Written on September 29th, 2010 , Diesel Texten, Texten up Platt
63. Bevensen-Dagfahrt

Dat 3. Weekenn in September: Bäämsen!
Van overall komen de Plattdüütsen binanner, un van ‘t Jahr is en Reuterjahr, un daar is dat Motto: “Wat wull de Kierl? – 200 Jahr Fritz Reuter”
Film,Theater,Bokenkritik,Sülvst-wat-vörlesen,de Johannes-Saß-Pries, plattdüütse Kark,Mitnanner Pläseer hebben…
för elk un een is daar wat bi! — Mehr unner:

http://www.bevensen-tagung.de

Leave A Comment, Written on September 3rd, 2010 , Bevensen Dagfahrt, Diesel Info, Links Literatur, Priesen
Gedicht van de Maant – Sept. 2010

Dat is heel eenfach, wat wi daar nehmen: En Gedicht van Gertrud Cramer, de Frau kann schrieven, un se hett dat verdeent: Se word 85. Ok hör Gedicht steiht in dat Book “De 100 moiste oostfreeske plattdüütse Gedichten”, rutkomen bi DIESEL. Un en anner Gedicht is (mit Verklaren, dat heet: Interpretation) in dat Septemberheft van
OMa. OMa is dat Ostfriesland-Magazin, bi Vlg. Soltau-Kurier, Norden.

Gertrud Cramer

Vandaag

  • bün ik
    rein ut de Kedd
    hebb slapen
    as en Rött in ‘t Nüst
    un dröömt
    de Nacht was
    so arig* moi
    un as
    up Feren leep ik
    dör dat Gras

    so week un gröön
    ik harr nix an
    de Wind was still
    un denn
    de Hemel
    glinsterblank
    un dörsichtig as Glas

    ik hebb mi
    neet ‘nmaal scheneert
    daar was ja nüms
    de mi bekeek
    de Keerl in ‘n Maan blot
    spinnefippsig bleek
    he sleek
    to tüütjefleiten*
    vör mi up

    ik doch
    ik was en Wicht
    noch jung
    un in de Wilgenboom
    en Vögel sung
    so zart
    so sacht

    *) arig = eigenartig, fremd, seltsam, wunderlich
    *) tüütjefleiten = locken

    • Leave A Comment, Written on September 3rd, 2010 , Diesel Texten, Schrieverkring Weser-Ems
    Septembermaant — Plattdüütsmaant

    Ja, so is dat. Siet Jahren al. In de Septembermaant kummt dat plattdüütse Leven weer in Gang. Ferientied vörbi, nu is weer Tied för Theater, Schrieverswarkstejen, Plattproten, Musik hören.
    In >> Bevensen komen de Plattfrünnen ut heel Düütsland binanner, de Priesdrager van de Freudenthalpries word ehrt, un de DIESEL 73 kummt to rechte TIed – in d’ Augustmaant al — rut.

    Leave A Comment, Written on Juli 30th, 2010 , Bevensen Dagfahrt, Diesel Info
    << Older Entries
    Newer Entries >>

    Diesel – dat oostfreeske Bladdje is proudly powered by WordPress and the Theme Adventure by Eric Schwarz
    Entries (RSS) and Comments (RSS).

    Diesel – dat oostfreeske Bladdje

    Plattdeutsch im Netz