An de 4. Januar hett se Gebuursdag, de grote oostfreeske Schrieverske Wilhelmine Siefkes ut Leer. Leevt hett se van 1890 bit 1984, dat heet: se weer nu 120 Jahr old worden. Bekennt is se wied over Oostfreeslands Grenzen weg dör hör Roman KEERLKE, för de se 1940 de Fehrs-Pries tosproken kreeg.
An hör Gebuursdag word all veer Jahr – un 2010 ok weer – bekannt geven, well de Wilhelmine-Siefkes-Pries kriegen sall.
Utgeven word he 2010 an de 22. Januar in dat Raadhuus van Leer.
De Pries gung bit nu to:
1990 an de Groninger Dichter Henry Hes för sien Gedichten unner de Titel “Nadörst”;
1994 an Udo Franken ut Emden för sien Kriminalstorys & an Karl-Heinz Madauß ut Parchim för sien Geschichten van Oll Hinnerk;
1998 an Kees Visscher ut Veendam (NL) för sien Geschichten “De Mann van de Boom”;
2002 an Siegfried Kessemeier ut Münster för sien Gedichten unner de Titel “inoin”
2006 an Arend Remmers in Schwelm för sien Book over Namen van Steden un Dörpen in Oostfreesland “Von Aaltukerei bis Zwischenbergen”
2010 — so laat uns hopen, sall de Pries doch maal in Oostfreesland blieven….
Hermann Boerma
Wenn ‘t Wiehnacht west hett
Wenn ‘t Wiehnacht west hett, un nu kummt Neeijahr…
Wo gries de Dagen! Na de Tiedenpütt*
Buck ik mi daal. Un hör! Van unnern lüddt
De Klock van Huus! Klock ut mien Jöögd! Un daar
Komen se an: Oll Moder un oll Vaar*
Un all mien Volk. – Wo lang al unnerrütt*! -
Un wi vertellen – (Wat störmt dat weer un gütt) —
De oll Geschichten, kruus un wunnerbaar.
Un wi vertell’n. Un word geen Woord doch proot,
Hör Ogen stahn as Keersen still un groot
Un sünd van Nacht un Dodenslaap so swaar.
Se staarn mi an, of ‘k hör de Stee noch günn
Um d’ Füürheerd to, blot för en Dunkerstünn.
Wenn ‘t Wiehnacht west hett un nu kummt Neeijahr.
*) lüden = läuten
*) Tiedenpütt = Brunnen der Zeit
*) unnerrütt = unter der Erde, begraben
*) Vaar = Vader
Ok dit Gedicht steiht in dat Book: Carl-Heinz Dirks (Hrsg.): De 100 moiste oostfreeske plattdüütse Gedichten. Emden. Diesel Verlag 2008.
Un verklaart word dit Gedicht in dat OSTFRIESLAND-MAGAZIN van Januar 2010.