De Schrieverkring Weser-Ems kwamm in de Oktobermaant to sien Harvst-Warkeldag binanner, ditmaal weer in Emden. De Schrievers hebben in ‘t Emder Raadhuus arbeidt vör Billers un Videos van Marikke Heinz-Hoek, un an de Avend in de Rummel van ‘t Raadhuus ‘n Lesung hollen. An d’ Sönndagmörgen was ‘n lüttje Fierstünn in ‘t Huus van de Caritas in de Bollwarkstraat 49 to Gedenken an Fritz Gerhard Lottmann, de an de 7. Oktober 1880 an disse Stee geboren wurr. Johannes Diekhoff hett sük lange Jahren mit Lottmann un sien Wark befaat un is nu heel blied, dat en Gedenkplaat an de Dichter erinnern deit. „Dat Huus sünner Lücht“ is de grote Romaan van Lottmann (bi SCHUSTER weer upleggt), un ok sien „Staatjes ut Poggenbörg un Jipjap“ sünd lesenswert (bi ISENSEE rutkomen).Un in dat oostfreeske Bladd DIESEL stunn faker wat over un van Fritz Gerhard LOttmann. Proovheft stüren wi… Carl-Heinz Dirks
De Oostfreeske Schrieverslü weer kemen in ’t Europahuus in Auerk tosamen. Wat ’t Nejes gifft? Siet sess Jahr kehrt Ubbo Gerdes sük um dat Vörleestelefon. All weren sük enig, dat ’t bi Ubbo in beste Hannen is. Hans-Hermann Briese will hum d’r in Tokummst Stütt bi geven. Siet 25 Jahr kann man sük Geschichten vördragen laten, maal up Platt, maal up Hoogdüüts. Johannes Diekhoff harr domaals de Idee daarför. Upstünds worden 1000 Anropen in elke Maant registreert. Dat is en hele Bült. Dat Vörleestelefon hett de Nummer 04941- 699944. Well ut Auerk up Festnetz anröppt, lett de Vörwahl weg.
Punkt Nummer twee weer de Vergaav van de Jahrespries. Bi de hoogdüütse Texten kunn Werner Schönherr sük sünner Konkurrenz dörsetten. Sien Geschicht harr de Overschrift „Nicht jeder Duft ein Wohlgeruch“.
Bi de Plattdüütsen weren over ’t Jahr Annegret Neunaber, Hans-Hermann Briese un Carl-Heinz Dirks as Beste taxeert worden. Se mussen daarum strieden, well de Pries insteken kunn. Egentlik harren se ’t all dree verdeent. Carl-Heinz Dirks, de sülvst neet komen kunn un Gerd Constapel nöögt harr, dat he sien Text vördragen sull, kreeg de meeste Stimmen för de Realsatire „Dat Openlüchttheater“ tosproken, heel knapp vör Hans-Hermann Briese mit sien Zyklus „Stappen“ un Annegret Neunaber för hör „Katt“. (Manfred Briese)