Elke Maant en oostfreesk Gedicht, elke Maant een van de moisten – so as se stahn in dat Book van Carl-Heinz Dirks: “De 100 moiste oostfreeske plattdüütse Gedichten” Diesel-Verlag 2008.
Vör 50 Jahr is Berend de Vries overleden, een van de grootste Lyrikers in Oostfreesland. Hum to Ehr vandaag sien Gedicht “Düüster Maan”. Dat Gedicht word ok interpreteert in dat “Ostfriesland-Magazin” 11/2009 Verlag Soltau-Kurier, Nörden. Un Otto Groote hett dat vertoont, to hören up sien Spegelplaat “De anner Steerns an d’ Heven”, to kriegen bi www.otto-groote.de
Hier nu
BEREND DE VRIES
Düüster Maan
Dat hele Eiland sleep in Free
Un blot dien Fenster was noch lecht.
Ik hörd’ up d’ Düünpadd noch dien Tree,
Noch droog de Wind, wat wi uns seggt.
‘t was Nacht un wulkendüüster Maan;
Achter de Dünen reep de See,
Un reep mi to: Mit mi musst d’ gahn,
Van Oost ten West, na Luv un Lee.
Dien Lücht gung ut, ik stunn alleen.
Ik gung an Boord un satt in Lee.
Un lang noch satten wi to tween,
De See un ik, ik un de See.