An ‘t Week-Enne van de 24. un 25. Oktober is de Schrieverkring Weser-Ems in Emden to Gang. An de Saterdag sitten Schrievers in ‘t Emder Raadhuus vör de Biller van Marikke Heinz-Hoek un maken daar Gedichten un Prosatexten to, de dann savends um Klock 8 in de “Rummel” vörleest worden – tosamen mit anner Texten. Togliek word erinnert an Greta Schoon un an ‘n Riege Emder Schrieverslü.
An de Sönndagmörgen gahn wi denn um k’teer na 11 na de Bollwarkstraat, na de Stee, waar Fritz Lottmann geboren is, de DIchter van “Dat Huus sünner Lücht”.
Elk un een is nöögt, to komen un to lüstern.
Freudenthal-Pries an Gerd Constapel!
Een van de grote Priesen, een, de wat tellt in de plattdüütse Welt, dat is de Freudenthal-Pries. De kummt al faker maal na Oostfreesland of tominnst in de Kuntrei van Eems un Dullert. Van ‘t Jahr geiht he an Gerd Constapel ut Leer. (He hett hum al ‘n Maal ehrder haalt: 2003.) Wi graleeren van Harten!
Dat is en Gelegenheid, dat wi ok ‘n Gedicht van hum brengen. Een, de ok in dat Book steiht “De 100 moiste oostfreeske plattdüütse Gedichten”, rutgeven van Carl-Heinz Dirks bi DIESEL. Dat Gedicht heet
Raakwark*
Sien Grootvader Reint Reints un Reiner,
Sien Vader: De een so fix as de anner.
Elk hett en Stee bi VW.
He sülvst heet van René.
René mit en Streek up dat „e”
(So as en Mester hum see).
Hip Hop finnt he okay
Un de Rappers van „MTV Twee”.
Van ‘t Leren hollt he nix,
Van Mesters noch minner.
He meent, elk sücht, wo cool he is,
Nett so cool as de Rappers
Van „MTV Twee“. Ok he
Kummt mit hunnert Woorden torecht
Bi ‘t Proten. Bedröövt* is ‘t mit ‘t Schrieven.
Un dat he ‘t Reken neet kann,
Is de Mester sien Schüld.
Dat is dat, wat René daarto meent.
En Lehrstee is Raakwark.
Sien Vaders Fründ Achmed hett hum
Nu in sien Grööngoodwinkel
Un lehrt hum bi Tieden dat Reken,
So wied, as dat mutt un
Sodraa René Tied hett
Tüsken Töönbank un „MTV Twee“.
*) bedröövt = kümmerlich
*) Raakwark = Glückssache
In de Septembermaant geiht de Sömmer so liesaam in de Harvst over, ‘t word ehrder weer düüster, un wi hebben weer Tied savends ‘n Book to lesen, ‘n Gedicht to schrieven of na ‘n Kunzert to gahn…
An 29. August hett dat Otto-Groote-Ensemble in de Gulfhoff in Engerhaaf sien neje Spegelplaat vörstellt: “De anner Steerns an d’ Heven”. Dat was wunnerbaar. Un wunnerbaar is de hele CD. De kann een bestellen bi www.otto-groote.de Un well eerstmaal ‘n bietje van de Musik hören will, geiht up www.myspace.com/ottogroote
Stöön kregen bi dat Wark hett dat Otto Groote Ensemble van Bert Ridderbos un Linda Nijland. Wat hett de ‘n Sophraan!!! To hören unner www.lindenijland.nl
An dat Week-Enne 12./13. September spölen bi dat 2. Oostfreeske Bardentreffen www.JanCornelius.de, www.blaumusik.de (dat sünd Günter Orendi un Werner Willms, Helmut Debus (sünner Web-Sied) un www.laway.de
An de 26. September is dat 500 Jahr her, dat in de Cosmas-un Damian-Flood de Eems sük ‘n neei Bedd söcht hett un 10ooo un mehr Minsken sünd verdrunken. An de Dag geböhrt heel vööl, ok Musik van LAWAY un Otto Groote un Linde Nijland. Mehr daarto bi www.sturmflut1509.eu un in de Dagbladen.
Jan Cornelius / Dreeklang treden ok up an 6. September in Leer un an 1. November in Engerhaaf mit ‘n Greta-Schoon-Programm.
Wieder ein großer Erfolg der ostfriesischen Folkband LAWAY. Die aktuelle CD der Gruppe wurde zur CD-Empfehlung der Liederbestenliste für den Monat September auserkoren. (siehe: www.liederbestenliste.de – CD und Lied Empfehlung, dort finden Sie den Wortlaut des Juroren).
Die CD “Brood un Rosen” erschien anläßlich des Freilichttheaters “Törf un Strom” in Wiesmoor in diesem Sommer. Die Platte, die sowohl plattdeutsche als auch hochdeutsche Lieder enthält, wurde damit ebenfalls wie das Album “Seils ut Sülver” aus dem vorherigen Jahr bundesweit ausgezeichnet. “Das hat vor uns noch keiner aus dem ost-friesischen Raum geschafft”, so der stolze Bandleader Gerd Brandt. Erschienen ist die CD bei ARTyCHOKE, dem Musiker-Label für plattdeutsche Lieder und regionale Musik, das ebenfalls Brandt ins Leben gerufen hat. (www.artychoke.de). Auf der neuen Homepage von LAWAY kommt man direkt zur Auszeichnung und findet auch alle kommenden Konzert- und Auftrittstermine. So spielt die Gruppe demnächst bei der Plattdeutschen Woche auf Norderney (10.09.), beim Friesischen Bardentreffen in Remels (12.09), beim Fest der Städtepartnerschaft Aurich-Appingedam am Upstalsboom (20.09.) und beim Gedenktag zur Cosmas-und-Damian-Sturmflut in Emden an der Großen Seeschleuse (26.09).
Septembermaant, Plattdüütsmaant. In Oostfreesland proten se disse Maant overall besünners vööl Platt. Kiek daarum ok up de Sieden van OOSTFREESKE TAAL. Man wi willen ok de olle Dichters neet vergeten: Vör 25 Jahr is Wilhelmine Siefkes overleden. Daarum hier un nu en Gedicht van hör, dat ok in dat Book “De 100 moiste oostfreeske plattdüütse GEdichten” steiht, un dat ok besproken word in dat OMA – Ostfrieslandmagazin van Soltau-Kurier Nörden, Utgave September.
Wilhelmine Siefkes: So
Vörvörjahrstied.
Noch liggt unner ‘t swarte Kleed
de Grund un ückert* sük neet.
So
slöppt noch dat Hart in de Bost.
Un Maimaant kummt.
Dat spruutjet un gröönt un deit
un breckt de Knoppen un bleiht!
So
röögt sük dat hete Blood.
O Sömmersünn!
Miteens draggt Rosen de Doorn,
Mahnblömen brannen in ‘t Koorn.
So
brannt wall de rode Leevd’.
Un Harvstwind weiht,
jaagt Bladd för Bladd dör de Lücht,
un Sömmer un Sünne verflüggt.
So
weiht ok dat Glück vörbi.
Och witte Sneei!
Nu weet de slapende Eer
van Lüst un Jammer nix mehr.
So
kummt dat Leven to Rüst.
*) (sük) ückern = sich äußern, reden