Johann Friedrich Dirks
Ik gah as dör en Wunner
De Boom is vull van Blössems,
De Lücht is vull van Sang,
De Wereld is vull Sünnschien,
Mien Hart is vull van Klang.
Waarhen ik ok mag kieken,
Waar ik mien Kopp hen dreih,
Ut elker Blomentuuntje,
Daar lacht mi an de Mai.
Ik gah as dör en Wunner
Mit Ogen hell un blied –
Wat büst du moi, mien Heimat,
In disse Vörjahrstied!
———————–
Is dat neet moi? Dit Gedicht un 99 annern stahn in dat Book “De 100 moiste oostfreeske plattdüütse Gedichten”, 2008 rutkomen bi DIESEL. Un ‘n heel Riege daarvan word besproken in dat “Ostfriesland-Magazin”, beter bekennt as OMA, in de Verlag Soltau-Kurier in Nörden. All twee Maant – in Maimaant nett dit Gedicht.