Dat is ‘n besünner Keerl un ‘n besünner Gebuursdag.  DIESEL brengt to disse Gelegenheid en Text van hum, de ‘n Bült utseggen deit over dat Gebuursdagskind:

 Johannes Diekhoff: De Korrektur

Mien Vader is mit 54 stürven.
Ik bün nu al vööl oller as he.
Man he seggt alltied noch mien Jung an mi.
Un ik, ik höör up hum!

Dat was in dat Vöörjahr 1944. Se harren mi ut dat Lazarett entlaten. Ik kunn sünner Stock lopen,un ik kunn mien Arm weer bruken. Man de Dokter meende,an de Front kunn un muss ik nich mehr.
Un ik muss doch.
Wenn ik dör mien Dörp humpelde, truffen mi de Ogen van völe Ollen un van junge Fraulü, de um een van hör Nahsten trüürden. Dat truff mi in ‘t Pitt, un dat dee sehr!
Ik leevde!- Mien Leven was nich sünner Pien, man ik leevde!
Wormit harr ik dat verdeent?
Ik kunn mi freien un kunn ‘t doch nich!
Ik funn Dokters, de mi begrepen.
De Dag kwamm, an de ik Ofscheed nehmen muss.
Mien Frau leet sük dat nich marken, dat se dit Utnannergahn in Trüür un Hartsehr up sük namm. Wi harren vör een Maant eerst uns Hochtied hatt.
Mien Moder raarde leep.
Mien Vader gung mit mi na de Straat, wor de Bus offuhr. Up de Padd daarhen mook he vööl Woorden; he wull de Stillte nich. Un he wull mi noch wat mitgeven van dat, wat in hum togang was.
„Mien Jung!“, see he, „wi könen de Krieg nich mehr winnen, un wat sall ‘t? Ok en Krieg winnen heet, tovööl verlesen!“
De Bus kwamm an. Do see mien Vader: „Mien Jung, glööv mi dat, elker Krieg is dat Quade an sük.- De naarste Free is beter!“
Ik harr mi nich in de Tucht, un ik see kört un hard un was heel Offizeer: „De Pazifismus,Vader, is de Politik van de Bangbüxen, van de Feiglinge!“
Ik seh dat vandage noch, wo dat um mien Vaders Mund tuckde un trillde. Ik wuss, so sach dat ut, wenn mien Vader raarde – sünner Tranen.
He langde mi de Kuffer to.
Wi gaffen uns de Hand.
De Bus fuhr of.
Ik keek torügg.
Ik sach mien Vader lüttjeder un lüttjeder worden.
He hett nich lang mehr leevt.
He is stürven, as ik gefangen weer.
Sien lesde Woorden sünd in mi immer groter un groter worden.
„Elker Krieg is dat Quade an sük!-De naarste Free is beter!“
Faak hebb ik dat an mien Kinner un de hör Frünnen seggt.
Vandage glööv ik: „Mien Vader harr recht, un he hett immer noch recht!“

Mien Vader is mit 54 stürven.
Ik bün nu al vööl oller as he.
Man he seggt alltied noch mien Jung an mi.
Un ik, ik hör up hum!