De 100 moiste oostfreeske plattdüütse Gedichten stahn in en Book mit nett disse Titel.  Rutkomen bi DIESEL, to kriegen in de Bookhannel un wiss bi hans-hermann.briese@diesel-online.de un carl-heinz.dirks@diesel-online.de un andreas.gerdes@diesel-online.de
In dat Maant-Bladd OMA worden welken daarvan in d’ Loop van de Tied vörstellt – nu in de Januar-Utgave dat eerste “De vertwiefelnde Leevhebber” van J. L. Lange …
Man hier vandaag un de heele Maant en Neeijahrs-Gedicht:
Hermann Boerma: Wenn ‘t Wiehnacht west hett

Wenn ‘t Wiehnacht west hett, un nu kummt Neeijahr…
Wo gries de Dagen! Na de Tiedenpütt*
Buck ik mi daal. Un hör! Van unnern lüddt
De Klock van Huus! Klock ut mien Jöögd! Un daar

Komen se an: Oll Moder un oll Vaar*
Un all mien Volk. – Wo lang al unnerrütt*! -
Un wi vertellen – (Wat störmt dat weer un gütt) —
De oll Geschichten, kruus un wunnerbaar.

Un wi vertellen. Un word geen Woord doch proot,
Hör Ogen stahn as Keersen still un groot
Un sünd van Nacht un Dodenslaap so swaar.

Se staarn mi an, of ‘k hör de Stee noch günn
Um d’ Füürheerd to, blot för en Dunkerstünn.
Wenn ‘t Wiehnacht west hett un nu kummt Neeijahr.

*) lüden = läuten
*) Tiedenpütt = Brunnen der Zeit
*) unnerrütt = unter der Erde, begraben
*) Vaar = Vader