Leve plattdüütse Frünnen, en Adventskalenner is moi,
un noch mojer is ‘n Advents-Klenner up Platt.
Van de 1. Dezember an, elke Dag neei. Klick an de rechte Sied up >>>
Links — Briese, Hans-Hermann!
Ut dat Book “De 100 moiste oostfreeske plattdüütse Gedichten” – vandaag:
Hilde Frauke Wichmann-Steen:
He hull de Klock an
Weer muss he an ‘t Wark!
He wurr stüürt, eenfach henstüürt.
Dat Huus mit de völe Lüchten sull ‘t wesen.
Mit sien slepende Gang streek he daar um to.
Nüms kreeg hum to sehn,
Nüms hett hum hört!
Dör de Kamer truck dat kold.
He luurde in de Fensters
He muss, he muss
Dat doon!
Stapp vör Stapp,
Dör de Döör,
Over de Gang,
Gung he.
In de Kamer
Wurr dat al koller.
Nüms sach hum.
Do dee he de Kamerdöör open
Noch en Tree,
Do was he bi de Bedd, un –
He was stüürt – he muss
Dat nu doon.
Do namm he
De Aam weg, van de,
De dor lagg.
He hull de Klock an.
Un ‘t wurr
Iesekold
In de Kamer. Un ‘t wurr still,
Heel still.
Ut dat Book “De 100 moiste oostfreeske plattdüütse Gedichten” - vandaag:
Arend Dreesen: Regenleed
Höör, wo dat regent,
Wo ‘t regent, dat ‘t gütt!
De Waterhex sitt
In de Regenpütt.
Hett teihndusend Ogen,
‘n Steert as ‘n Fiss,
Un wenn se herut kunn,
Denn hool se di wiss.
Höör, wo se pluntjet
Un plantjet un swemmt,
Mit gliddrige Hannen
An de Püttrand sük stemmt!
Mit teihndusend Ogen
Gluupt se in de Dag,
Un hojahnt* – un dumpelt
Torügg mit Gelach.
Höör, wo dat regent,
Wo ‘t regent, dat ‘t gütt!
De Waterhex sitt
In de Regenpütt.
Noch dree Week so wieder,
Denn swemmt se herut
Un sluckt alls man runner,
Wat wiesnööst* un luud.
——–
*) hojahnen = gähnen
*) wiesnösen = naseweis sein
Dat gifft ‘n Riege van Priesen, de tellen in de plattdüütse Welt.
Un dat gifft ‘n RIege Schrievers, de tellen wat in de plattdüütse Welt.
Un bi Helga Hürkamp komen de beid Sieden binanner: Se hett de Borsla-Pries 2008 tosproken kregen! Daar graleeren wi to, un sünd blied mit Helga un blied mit de Umstand, dat se ok to de Schrieverkring Weser-Ems tohören deit. En Vereen, de mehr will, as Platt blot to “plegen”. Hier steiht nu een van Helga hör Texten:
(noch nich)