Mit de Palmsönndag beginnt de Paasketied. De Dagen van d’ Karweek un de Dagen d’r achteran hebben en besünner Naam:Palmsönndag, blau Maandag, geel Dingsdag, witte Middweek, gröön Dönnerdag, still Freedag, husenbusen Saterdag, hickenpicken Sönndag, eiertrüllende Maandag, upfreten Dingsdag.
An Grööndönnerdag mutt na oll Wennst Negenderlei, en Mahltied van negen verscheden jung Krüden of Kohl eten worden.
Dann kummt Paasken, dat hoogste un ollste Fest van de Christenheid, dat fiert word an de Sönndag na de erste vulle Maan in ‘t Vörjahr, (tüsken de 22. Märt un de 25. April). Vööl Bruukddom is noch lebennig, ok ut de vörchristelke Tied. So kennen wi dat Ofbrannen van ‘t Oosterfüür.
Froger hebben bi disse „Paaske in de Mööt brannen“ heel Gemeenten mitmaakt, vandaag is dat blot ‘n Saak van de junge Lü.
´n grote Rull to Paasken spöölt dat Ei. An de Mörgen van d’ Oosterdag mutten Eier up elke Tafel to finnen wesen, un een mag sovööl eten as man geiht. Eier worden ok verschunken, meesttied bünd se dann klört.
De Kinner hebben es Nüst vull Eier, of se mutten hör söken.
Dann kennen wi ok dat Eierbicken un dat Eiertrüllen. Willen wi ok de Oosterhaas neet vergeten. Nett as de Eier hett ok he wat mit de Fruchtbarheid to doon, man waarum he de Oostererier leggen mutt – dat weet keeneen! ‘n oll oostfreesk Kinnerwoord seggt denn ok:
„Ik wünsk jo ‘n fröhlich Oosterfest;
sünd mien Tüütjes hier ok west?
Heben se mi ok Eier leggt?“
Paasken is en Fest so recht för Kinner, un so is ok de Wünsk van en Oostfreesenkind to verstahn: „Ik wull, dat alltied Sönndag weer un overmörgen Paasken.“ chd