Carl Dirks hett mi anproot un fraagt, of ik neet ‘n Menen harr to Dien neje Spegelplaat „Dreeklang“, un ik harr d’r in’t Leven nix to schreven, wenn ik neet seggen kunn: „Dat, wat ik daar höört hebb, dat finn ik good!“
Een herunnerrieten is mien Saak neet. Un Dien Wark andaalhalen – wiss neet. Man in disse Gefall was d’r ja heel un dall keen Gefahr, dat ik dat doon muss.
Man ik mutt seggen, un dat weetst Du, un ok ‘n bült anner Lü, ik bün neet objektiv, as wi up Platt so seggen.
Daarför is mi dat, wat Du, Jan, up ‘t Rebett van Musik maken deist, vööl to dicht bi.
So dicht bi,dat ik in mien Kunzerten un up mien Spegelplaten Texten un Leder van Di singen doo. Was dat neet so, dat mi ok sülvst henn un weerdenn ‘n egen Song infallen dee, denn dee ik mien Kunzerten wall to’n grootsten Deel mit Leders van Di, Jan, bestrieden.
All de Platen un Spegelplaten, de Du bit nu hen inspöölt hest (teihn sünd ja as CD up d’ Markt), sünd en grote Schatt an moje Songs up Platt. In de beste Sinn Volksmusik ut uns Kuntrei. Un ik lööv, dat ik wiss neet all de Leder kennen doo, de Du schreven hest. Hebb n’ bietje Nasicht mit mi. Dat bünd eenfack unbegriepelk vööl.
Man de Leder van de neje Spegelplaat kenn ik all, un ik kenn hör so good, dat ik elke mitsingen kann.
Van de eerste bit to de lesde Leed hest Du hier ‘n CD klaarkregen, de sük neet versteeken mutt.
Du büst en Muuskant un Schriever, van de wi denken, dat wi hum kennen. Van de wi so völe Leder hört hebben, dat wi ‘n seker Quälität verwachten könen.
Elk de Di kennt, is blied, wenn ‘t ‘n neje Spegelplaat van Di geven deit. Daar is alltied so vööl Mojes up. Nee – besünners Mojes. Dat weet een. Un meestieds is ‘t noch mojer, as wi verwachten wassen.
So löppt de Tied, wi worden allmitnanner oller, man kennt sük, un dat hett ja ok wat. Un mitmaal kummst Du un overrumpelst mi heel un dall.
Is neet so, dat ik Di neet weerkenn. Nee, Dien Musik blifft frünnelk, laadt in, is vertroot un weekmodig as alltied.
De Leder sitten ok, as vördeem, vull van wunnerbaare „Woordenbiller“ un „Woordenmalereei“ de mi lehren, de Welt  ‘n bietje akkerater antokieken.
Man Du, Jan, as Sanger un Muuskant, Du hest mi verbaast. Van vörn bit achtern klingt de Spegelplaat jung un frisk, neet as van een, de all teihn CDs achter d’ Rügg hett. Nee, ‘t lett as dat Wark van een, de nett mit heel wat Neeis an Gang is.
Natürelk hebb ik tohört un overleggt, wo Du dat maakt hest. Na ‘n sett Simeleren bün ik, un daar kannst ja heel neet an vörbi, daar bün ik up „de Neje“ komen.
De Neje – dat is, (Du weetst dat al, Du hest hör ja entdeckt för de Oostfreeske Folk-Szene) Christa Ehrig, de so baldadig Cello spöölt. Se, de to Di un Klaus Hagemann wunnerbaar passen deit as Pott un Decksel.
Se brengt ‘n heel egen un üterst egenhannigen Bidrag to de moje Tweeklang van Di un Klaus.
Se gifft Dien un Klaus sien Gitarrenspööl en Basis, sünner dat se blot de Footdeel is. Se hett wat to seggen, un dat wat se seggt, is neet blot so henseggt. Un hier liggt, lööv ik, dat Geheem un de Tover van disse Spegelplaat.
Daar sünd dree Muuskanten tosamen, van de nüms dör Tofall dit of dat of heel wat anners spöölt, Dree, bi de een marken deit, dat se Pläseer d’r an hebben, wenn se mitnanner spölen.
Elk een van Jo tillt de anner hoog up ‘n besünner Maneer.
In elke Ogenblick hebb ik dat Geföhl, dat Ji Dreijen Jo Fliet doon tegenover de Songs, Ji maken dat neet, um dat de Lü dat verwachten, un wiss neet ut Hoffaard.
Un so kummt daar dat bi rut, wat de Titel van de Spegelplaat verwachten lett: Dreeklang. En Dreeklang, as he mojer haast neet wesen kann.
Du kannst seker sien, ik vertell elk un een de sük för uns Saak intresseert, dat he nix verkehrt maakt, wenn he Dien neje Spegelplaat „Dreeklang“ kopen deit. He findt d’r seker weer ‘n neje leevst Leed van Di.
Wat mi angeiht, an leevsten hör ik, man dat wesselt, „En Spierke Glück“, en Text, de ik sülvst geern schreven harr, man – spietelk is ‘t – Du hest hum schreven, beste Jan, un wunnerbaar vertoont het hum – ok neet Otto, nee, dat was Klaus Hagemann. Kompliment!

Waar gifft ‘t de Spegelplaten? Bi www.artychoke.de un bi www.jan-cornelius.de un bi Jan in Jemgum sowieso.