van Annegret Neunaber

Een Katt leeg slaperg up hör Matt.
Hör Buuk weer vull. Se weer so satt.
Do reep de Kater: „Pussikatt,
fahrst du mit mi na d’ Stadt mit Rad?“

Do see de Katt: „Ik fleut di wat,
ik gah gliek eerst in ‘t Hallenbad
un denn snapp ik mien Mountain-Rad
un fahr alleen mit Rad na d’ Stadt.“

Na ‘t Baden steeg de Katt up ‘t Rad.
Dat regen un dat Padd wurr glatt.
Do full de Katt un brook sük wat
un humpel nu mit Rad na d’ Stadt.

De Lü, de wunnern sük: „Wat ’s dat? -
Hier weer noch nie en Katt mit Rad.“
De Polizei weer ok ganz platt
un broch na ‘t Krankenhuus de Katt.

In Gips legg man dat Been van d’ Katt.
Fiev Daag leeg se in d’ Stadt up d’ Matt.
Se reep an: „Hier is Pussikatt.
Ik ligg in ‘t Krankenhuus in d’ Stadt.“

De Kater froog, he weer ganz platt:
„Du liggst in ‘t Krankenhuus in d’ Stadt?
Ik koom glieks mit mien Motorrad
un haal di, segg, gefallt di dat?“

Do see de Katt: „Wat freut mi dat,
Wat maakt wi aver mit mien Rad?“
„Du musst di eerst verhalen, Katt!
Un is dien Been weer heel un glatt,

fahrt wi mit Motorrad na d’ Stadt
und haalt na ’t Inkopen dien Rad.“
De Kater froog: „Mien Pussikatt,
lettst du mi denn mit di up d’ Matt?“

Do see de Katt, ehr Og’n weern natt:
„Ik hebb di leev, mien Katerkatt!“
Un anner Dag stund denn in ‘t Bladd,
de beiden, de harren Verlobung hatt.

Se maakden Urlaub nu in ‘t Watt
un legen blied un satt up d’ Matt.
Dat weer de Story van en Katt:
Fiev Jungen weern dat Resultat.

De Kater see: „Wat scheert mi dat!“
He harr al lang en anner Katt.
„Un de Moral“, so seggt de Katt:
„Wenn ‘t glatt is, denn fahr nich mit Rad!“