Dat Book bestellen bi de Bookhannel of direkt bi Birgit Lemmermann

www.emil-online.de (dor ok de Film), Tel.04269-105833

Laudatio Lüttjepütt-Preis 2007 – van Wolfgang Rieck

Leewe Lüüd vun de Bevensen Dagfohrt
As ik dit Johr in’n Maimaand een dicken Breefümschlag in mienen Postkasten fünn, wier’k doch ’n beten niegelig, wat de Sporkassenstiftung mi as Jury-Mitglied taudacht harr.
Tauierst dacht ik an CDs odder so wat – man Pustekauken! ’n dick’ Manuskript vun 122 Sieden vun een Fru, vun de ik nie nich hürt heff: Birgit Lemmermann Worüm mi dat!!! So väl Arbeit un wenn dat nix is, mööt ik mi dor dörchquäln! Öwer so wiet is dat taun Glück nich kamen – un vun Qual kunn schon gor nich de Räd sien! Ofschonst dat mit den Titel vun de Geschicht’ al los güng: „Ebbe un Hehn“ Mit Ebbe kunn ik ja noch wat anfangen. Ik bün ja mol tau See führt – un Ebbe in min Pottmenee harr ik oft nauch. Öwer wat wier Hehn? Na ja, doför gifft dat ja ’n Wörderbauk – un dunn wier de Saak klor. Man richtig tausamen passen wullten de Wür nich so recht – öwer ik harr de Geschicht ja noch nich anläst!
Thadde – Thaddeus up hochdütsch – heet de Protagonist in disse Geschicht’. Een Jung vun 12 / 13 Johr, de mit sein Mudder un Kater Mikesch alleen in een Dörp middenmang in Norddütschland leewt. Thadde, de in dit Bauk vun sick sülwst vertellt, geiht in de 6. Klass un kann mit Mäkens nix nich anfangen. „Deerns finn ik blööd“ is sein Kommentar dortau.
Oma un Opa hebbt ehr Häuner un ’n Hahn schenkt. De Hahn heet Hans Heinerich – de Häuner hebben keen Namen, wieldat sei in’n Pott komen! Un as harr Birgit Lemmermann dat vörut seihn mit de välen Unwäders in dit Johr, gifft dat in de Geschicht an’n Anfang een gewaltigen Rägenschuer ower dat Dörp, dat dat oll Hus, in dat Thadde mit seine Mudder läwt, bald weggswemmt wier. Tiet tau öwerleggen, wo un wie un in wat man lewen will. Read the rest of this entry »