Gudrun Dekker-Schwichow ut Nörden försket siet Jahren over Familien in Oostfreesland un Groningen. Wi denken, dat wi hier ‘n heel smakelke Text hebben:

Störtebeker kummt ut de Eems-Dollart-Kuntrei

De Seerover of Likedeler Störtebeker hört to Mainhaaf un Oostfreesland, man wi weten ok, dat he eerst in de Oostsee sien Wark daan hett, lange Tied in Updracht van de Hanse. Later eerst wurr he verdreven, un de Likedelers hebben hör Unnerdack bi oostfreeske Hoofdlingen funnen. Van Oostfreesland kunnen se heel good de Schepen van de Hanse kapern, wenn de an de Eilanden vörbi seilden, un in de Waddensee wassen de Piraten neet to faten. Dat hett besünners de Hambörgers argert, se hebben Störtebeker to faat kregen un 1401 up de Grasbrook in Hambörg de Kopp ofslaan. Man – well dat nu was – Störtebeker? Waar kwamm he weg? – Dat hett Gudrun Decker Schwichow unnersöcht, un wat d’r bi rutsuurt is, dat willen wi hier even vörstellen.

Well ’n Book over Störtebeker in Hannen hett, de hett ok de Spröök in de Kopp: „Ik Jonker Sissingha van Groninga, Dronk dees hensa, in een flensa, door myn kraga in myn maga.” Dat stunn up Störtebeker sien Drinkbeker, un daar kann een sük fragen: Hett he de schunken kregen van en Jonker Sissingha? Hett he de as Büüt an sük nomen? Of wo sitt dat? ’n Hensa, dat is Vereen, daar hebben sük Kooplü tosamensloten. (>> HANSE!) Um daar Lidd to worden, muss een faak ’n Prööv bestahn, so as ok bi de Theelacht to Nörden vandaag noch. He muss „henseln“, dat meent, ’n Kroog vull Beer of Wien utsupen, un de Kroog of Beker wurr ok Hense nöömt. In een Flensa, dat is: in een Haal, – he gütt dat Natt so upmaal dör d’ Hals, lett ’t so in sien Maag störten, sünner to slucken, as enkele Lü dat könen. Daarvan de Naam „Störtebeker“! Dat is sien Ökelnaam al in en engelse Klaagschrift van 1405. Dat Groninga Groningen is, dat mutten wi nich bewiesen, un dat in de Stadt in ’t 15. Jahrhunnert ’n Adelsfamilie Sissingh wohnt hett in en Huus in de Oude Ebbingestraat, daar gifft dat Urkunnen van. De Familie stammt ut Drenthe. In hör Wapen föhrden se en rode Vogel Griep, de Störtebeker ok in sien Seil harr, van sien Schipp „De rode Düvel“. Tofall? In dat Familienbook van de Sissinghas gift dat en Johann Sissingh, geboren 1364, un unner de Naam hett he ok ’n Kaperbreev kregen van Graf Albrecht I. van Holland, an 15. August 1400. Woso heet he denn nu Johann un neet Klaus? De Sissinghas hebben alltied de Naam Johann in hör Familie hatt. Klaus, dat mutten wi verklaren. Wi weten, dat junge Lü ut Oostfreesland un Groningen to de Tied faak na Wismar to ’t Astuderen gungen (de Universität Groningen wurr ja eerst 1614 van Ubbo Emmius inricht). Un de jung Keerls wassen ruugweg 16, wenn se na de Uni gungen. Un nu findt sük 1380 de Indrag „Klaus Störtebeker“ in en Register in Wismar. Klaus, dat is de körte Förm van Nikolaus, un Nikolaus, dat is de Hillige van de Seefahrers. Dat passt doch. Un dat een sien rechte Vörnaam neet lieden kann, of sien Umgeven proot hum alltied anners an, dat kummt vör, ok vandaag noch. Störtebeker was in Groningen traut mit en Dochter ut de Familie von Klencke van Drakenburg, mit de harr he en Söhn, Gerd Klencke (ok Klinghe), na de Moder, de as Klockengeter benöömt was. Un Störtebeker harr wat mit Theda Wiards, mit de he up de Börg Upgant leevde. Ut disse Verbinnen stammt sien Söhn Hayo, de later de Arvdochter Ide Hemesten in Nesse traut hett. To BEWIESEN is dat uplesd neet, man ’t passt all so moi binanner, dat ’t wall angahn kann. ’t gifft völe Saken in de Histoorje, de lang neet so good beleggt sünd…

Na Unnerlagen van Gudrun Dekker-Schwichow platt maakt un bewarkt van Carl-Heinz Dirks.

Un noch ’n Woord achteran: Up de Börg Upgant wurren Störtebeker sien Hemd un Pantuffels burgen. 1864 schenkte de Wedefrau van Senden, ’n geboren Briesen, de Saken an de Emder „Kunst“. Disse Frau hört to de Familie Briese, waar Ji Hans-Hermann un Manfred kennen…